曾俊華、陳家強、陳德霖呢三位特區政府「財金三巨頭」好有默契咁齊齊出口術，警告香港市民不可高追入市買樓買股，曾司長首先在8月8日發表網誌講「完美風暴」，陳總裁在8月11日星期一發表網誌講「三重打擊論」，陳局長與陳總裁一齊在8月12日中午，各自與傳媒茶敍，為滬港通降溫，表示熱錢會流失，導致市場波動等等。
外國財金巨子出完口術唱淡，股市例牌郁一郁，向下調整，以示尊重巨子之言。點知香港就相反，三巨頭講完晒之後，股市樓市照升。市場人士當佢三位冇到！點解會咁嘅？無他者，曾陳陳三位仁兄揀在8月第二個星期發炮，好明顯係配合817反佔中遊行，為遊行助威，事先大力誇大佔中之負面影響，希望藉此鼓動市民反佔中，多啲參加817遊行。但市場人士好pro嘅，佔中與反佔中可分開嚟講，與股市樓市無大關係，佔中即使實現，阻住中環兩三日，金融界人士只係會當作一場超級颱風過後，有影響，有不方便，但無關宏旨，況且滬港通盛傳在十月開動，各路資金調嚟香港，各方人士磨拳擦掌，預備搵食，市道點會因為佔中嘅騷擾假設而散晒呀？除非咁，梁特首夠膽聲稱佔中係等於核子彈引爆，嚴重影響香港金融，叫中央取消滬港通，等啲股民憎死佔中人士，等更多市民上街反佔中，咁樣就會真正嚇死股市，釀成小股災咯。
三巨頭為了配合政治，高叫狼來了，徒然削減佢地嘅公信力。與1997情況相比，目前恒指P/E係11倍幾唔夠12倍，97時係超過20倍，講利率，目前低到無可再低，97時係八至十厘之間，講經濟大勢，南韓啱啱減息，歐日疲弱，德國不振，美國輕微復甦，與97時又唔同，故此整個世界並無加息條件，即使明年中起加息，亦係從0.25厘左右起步，甚麼完美風暴呀，形成風暴嘅條件在那裏？
曾司長講佔中威脅論，金融分析師當佢講笑話！大家信大好友林奮強好過。不過又可以咁諗，曾司長係要為政治服務，等一啲建制派有理由搵商界人士上街反佔中嘅啫，中資背景公司要僱員上街，工聯會猛咁打電話搵人上街，曾到工聯會課程上過堂嘅普通師奶都曾收到電話，為了817，建制派出盡食奶力，可話空群而出，如果人數唔夠墟冚，又係幾冇面㗎！