CEC國際（759）旗下阿信屋真係越做越誇張，由最初賣零食，到賣家居清潔用品、凍肉、化妝品，最近甚至開雲吞麵店，食肆都做埋；咁都唔止，阿信屋老闆林偉駿仲打算賣埋玩具，好似點都要搵瓣生意賺你錢咁話。
林偉駿透露，早排已經開始構思賣日本玩具，咁啱有其他玩具品牌搵佢洽商，於是就落實開間針對1至8歲小童嘅玩具專門店，名為「759 Toy's Land」。除日本玩具外，亦將會引入某大國際玩具品牌。新店位於九龍城，預計本月底開業。
林老闆估計，去到今年底，總分店數目有240間。目前零食仍然係主要收入來源，佔總額45%，但最賣得嘅產品就唔係零食，𠵱家喺暢銷榜排第一位係韓國嬰兒尿片，第二位係韓國嬰兒濕紙巾，第三位先至係紫菜。眼見嬰兒用品需求龐大，佢都會大力擴展呢瓣業務。