要揀出最強嘅股票，一定係股神嘅巴郡。巴郡A股上周四突破20萬美元，升呢做股王。但買咗股王都唔係威盡全球。例如喺香港，即使有一股巴郡A股，都買唔起一個細價樓單位；返去畢菲特嘅老家奧克拉荷馬州，一幢四房獨立屋，即買即住都得。巴郡升呢做股王後，相信好多投資達人都會重溫吓畢菲特嘅投資策略，尤其係其推祟嘅價值投資法，意思係唔理股價短線升跌，但抱住一份投資企業嘅心態，簡單啲講有五大準則：發掘公司競爭優勢、充裕現金流、市場價值規律（即別人恐懼時貪婪，別人貪婪時恐懼）、趁低吸納同埋堅持中長期投資法則。畢菲特嘅豐厚財富係一點點累積返嚟，估計其身家總值633億美金，約4,937億港銀。而畢菲特幾千億元身家，其中九成幾嘅財富係佢60歲後先賺到，亦印證畢菲特着重嘅長線投資。
識得講點樣長揸嘅人多，但真係學到股神咁做得到嘅投資者應該少之有少。睇返畢菲特嘅投資回報，現實中又有幾多人願意付出時間同耐性喎。套用美國投資大師Peter Lynch嘅比喻：投資好似減肥咁，最緊要係堅持。大家都知最work嘅減肥方法係少食嘢多做運動，大前提仲要係長期作戰。但能持之以恒嘅人甚少。多數人借助減肥藥，務求短時間內減磅……故真係學到畢菲特嘅價值投資兼嚴守長揸嘅投資者，值得開心但又注定孤獨，因為真係勁到冇朋友！
C+B
本欄逢周一刊出