一場反佔中大龍鳳，令阿爺睇清睇楚邊啲先係真正心腹！由西環牽頭成立嘅經民聯，撇除兩個向來鍾意離隊嘅劉皇發同石禮謙，齊齊整整拉大隊交數撐遊行，由黨內最大聲嘅盧偉國負責沿途叫咪。反之自由黨，就得零零星星幾個要員現身，仲要係起步完就即刻鬆人嗰隻，又難怪冇咁得阿爺歡心！
其中身兼行政會議成員嘅經民聯立法會議員林健鋒，喺起步前接受傳媒訪問，都係同中央同一口徑，話反佔中阻礙經濟云云。點知扑咪期間，佢身後突然出現一陣騷動，原來在場有位男士，無端端企圖想衝向佢，最終被工作人員帶走，動機至今不明，林健鋒則話自己見慣風浪冇有怕。