八月十日本欄講美國錢有文化貢獻，文末提及：「拿北京錢嘅『青年樂園』，邊有得比呀」，因此而引來一位「長期的忠實讀者」石中英先生嘅電郵，石先生仲有心到附上一篇好詳細嘅演講辭，係佢在2013年7月17日在理工大學一個講座發表嘅，講題係「我們認識的青年樂園」。
石先生話：「誤解往往由不溝通開始，偏頗往往來自事實了解的不足。」說的也是，左丁山對「青年樂園」從來只有「印象」，沒有「了解」，讀完石先生嘅講辭之後，知多好多嘢，也發覺自己嘅印象，原來唔錯得去邊。
（一）青年樂園是否拿北京的錢？石先生冇講到，但佢引述吳康民之「口述歷史」，就知道吳康民呢位左派大老，係幕後策劃人，吳康民講到明為了抗衡「中國學生周報」呢份國民黨在美國新聞處支持嘅受歡迎刊物，策劃出版「青年樂園」，1956年4月14日創刊，督印人黃穗華就是吳康民的小姨，總經理洪新就是吳康民的襟弟，社長兼總編輯汪澄是漢華中學美術教師、畫家，創刊社址設在黃穗華家中的一個房間。如此說來，以1956年的左派陣營僱員的微薄薪水，怎樣創辦一份周刊？即使唔收編採人工，排版印刷都要錢嘅啫，拿北京（泛指中共駐港機構）的錢，算是合理的懷疑。
（二）「青年樂園」有無政治性？石先生在演辭中話「中國學生周報」用中華民國年號、在台灣註冊、內容有相當政局評述、政治理念討論，更具政治性。50年代，本港絕大部份報刊以「中華民國」為正朔，三大報章華僑、星島、工商皆用民國年號，「中國學生周報」要在台灣發售，用民國年號不足為奇，「青年樂園」用公元若干年（如1962，不用民國五十一年），內容多講知識、文藝，好似唔講政治，但實際上就刻意招攬官校學生（按：據石先生講，1967年8月開始，有官校學生，如巴富街、金文泰、庇理羅士，陸續因在街頭發表言論或藏有標語被港英警察拘捕），全面與「中國學生周報」競爭讀者，降低「中國學生周報」嘅影響力，從這角度睇「青年樂園」嘅創立，根本就係一個政治決定。如果唔係，吳康民點解要在幕後策劃，不走到台前，講明抗衡「中國學生周報」？
（三）青年樂園有無影響力？石先生在演辭透露「青年樂園」之派報員、作者、編者之中，後來成名嘅，有陳坤耀、黃玉山、徐碧美、曾鈺成、曾德成、梁錦松、小思、陳毓祥、李國強等等，陣容又係幾勁嘅，回歸後在政壇更有影響力㖭！呢方面「中國學生周報」班人似乎冇得比。