前特首董建華家族控制嘅東方海外（316）上星期舉行業績會，繼續由董建華二仔董立新以署理財務總裁身份主持大局，查實佢擔任署理掌櫃呢個職位已經超過一年，雖然話東方海外係家族生意，由家族成員睇數都好正常啫，但係點解佢咁耐都唔坐正，或者認真請番個掌櫃呢？
東方海外大公關就解畫，指董立新絕對冇意思坐正，董生只係過渡性質。自從前財務總監金柏堅舊年5月離職後，公司已透過獵頭公司喺市場物色適當人選，只係一年多過去，都未搵到適合人選，仲話咁樣證明公司對人才要求係非常嚴謹喎。佢話，一旦搵啱人，董立新就只會做番執行董事職務。