包括微軟創辦人蓋茨與facebook創辦人朱克伯格在內嘅多位美國富豪近日興起玩「淋冰水」籌款，Green Monday創辦人楊大偉、專欄作家徐緣同埋康宏理財（1019）主席王利民噚日跟風玩埋一份。不過，佢哋暫時只係搵人挑機，未定實為邊個機構籌款。
楊、徐、王三人噚日早上10點喺西九海濱長廊自拍一條淋冰水嘅短片放上網，但由於大熱天時，佢哋帶去嘅冰，轉眼溶晒變水，睇條片，佢哋似係普通淋水多啲。
徐緣坦言，今次係受蓋茨接受朱克伯格挑戰影響，覺得呢件事係好人好事，喺美國玩咗成個月，香港都應該「與國際接軌」。若有人帶起玩埋一份，話唔定遲吓真係有慈善團體發起類似籌款活動。
遊戲玩法係佢哋先淋為敬，將片段放上網，每人再邀請三人接受挑戰，對方可於24小時內選擇淋冰水、捐錢或淋水加捐錢。徐緣打算向三位網絡紅人大埔LuLu、夏千福、司徒夾帶挑機，楊大偉搵項明生、顏卓靈、玩得嘅盛智文，王利民就揀蔡一智、陳淑莊、蘇施黃。即管睇睇日內有冇片睇嘞。
【部份被挑機人士】
