每年一度嘅無家者世界盃噚日喺旺角麥花臣球場舉行，目的係要為曾經失去生活方向嘅無家者重拾生活動力，好有意義㗎！向來熱愛足球嘅社民連立法會議員「長毛」梁國雄，噚日仲同民主黨單仲偕、香港集訓隊成員組成一隊，同無綫電視嘅兄弟幫踢咗場表演賽。雖然只係表演賽，但長毛都好畀心機，提早到場做定熱身，喺場邊拉吓筋，仲有唔少市民捉住佢要合照，成個足球明星咁款。到正式比賽時，長毛踢得有板有眼，其中有次埋門，仲俾對方後衞撞跌咗落地下，好彩冇受傷。雖然成隊人都好落力，但最終佢哋嗰隊都輸咗畀兄弟幫，完場比數係3比1。