自梁振英上場後，香港政界對立氣氛日趨嚴重，因梁及其背後政治力量抱着一種心態，就係泛民做初一，我哋做十五，口頭禪係「點解唔得」。你泛民做得，點解建制派就唔得，呢棚政治小學雞，搞出一壇小學雞政治，自己疏離香港中產主流。好似周日反佔中遊行，唔知畀佢嚇死，知就畀佢笑死。
如果建制派用群眾動員方式可以逆轉香港政局，民建聯及工聯會在歷次選舉中得票應早已超越五成，同理，梁振英在同樣政治力量支持下，曾發動過挺梁遊行，若果有政治效果，梁之民望早應脫離「表現失敗」之列。政改關鍵在於溫和中間群眾取態，而建制派群眾運動效果適得其反，令泛民溫和群眾感到厭惡。
本來群眾運動各有市場，但建制派一旦開動其群眾機器時，必定會出現「狀況」，包括招募職業示威人士，各系統組織由上而下強力動員時，令市民有「被迫」之感。更大鑊是來自左派基層團體，其口號、標語，群眾來源，均與主流本土社會格格不入。8.17反佔中遊行，本質上是「自High」式群眾運動，同歷次七月一日慶回歸及挺梁遊行無異，一般市民即使立場上不支持佔中，也不會參與8.17遊行，而以一千五百個建制派組織，包括同鄉會、街坊組織、文藝團體、政黨地區樁腳組織動員出來的群眾，不會對泛民政客及黨派產生任何政治壓力，令中間溫和派抬頭，最終不過係小學雞式鬥人多。而最荒謬的是政改根本唔係由公投或一次選舉去決定，唔係靠數人頭，而係靠政治精英之間幕後談判，明眼人一睇就會問：「晒馬嚟做乜？」
將政改扭曲為晒馬對決，根本無法促成妥協，反而令泛民內強硬派群眾更加強硬，而從中抽水得益就係梁振英，佢臨尾高調煞有其事簽名反佔中，就係想將8.17變為支持梁之行動。8.17後政府需要從泛民陣營中撬走五票，難上加難。
「鬥多人」係最粗糙嘅政治角力，政治是藝術，講求角色扮演、修辭技巧、傳意方法，判斷能力，猶如藝員歌星一台爛戲，靠世界Fans擧牌撐場，試問呢啲藝人，有邊個會真正受歡迎，得到群眾支持。當年2012政改，被何俊仁稱為「廢廢哋」嘅曾蔭權，都夠膽挑戰泛民高手，同辯才及民望均高佢一班之余若薇，進行了一場公開電視辯論，當然曾蔭權在辯論中一敗塗地，但至少佢仍然尊重文明之政治規範，嘗試用理性及論據說服泛民支持者。
時移世易，今日不論梁振英或林鄭，均躲在北京政治力量後邊，依附同鄉會、街坊會、書法曲藝粵劇太極班等左派基層群眾組織，搞政治搞到靠掹衫尾，一個冇官方身份、冇民意授權嘅公關佬周融，竟取代林鄭主導政改局面，實在可悲。
添馬男