【給予支持】
本港商場近年經常加入藝術或文化元素，希望在「熟口熟面」的商舖組合中，凸顯自己的特色。九倉（004）近年致力推動本港藝術教育，其藝術獎學金計劃，今年選出五位比賽得獎學生，以「無上限」形式，資助他們往外國或本地升讀藝術相關科目，九倉資助全數大學學費，涉及金額約360萬元。
九倉每年舉辦全港中學生繪畫比賽，首18名得獎者，得獎人可在三年內向九倉申請獎學金，今年合共11人申請，原本獎學金名額只有三個。「我同主席（吳光正）講，我揀咗五個，但好難取捨，佢話咁就送晒佢哋去啦！」是次計劃評審李玉芳說。
獎學金主要資助學生修讀藝術、設計及建築科目，李玉芳認為學生有意進修上述科目在香港較難得，冀給予支持。「香港父母通常逼佢哋讀啲自己唔鍾意嘅嘢，會叫佢地讀啲同職業上發展有關嘅。」希望學生未來回港在藝術建築相關發展，回饋社會。「我哋做物業投資，唔係淨係做一個看更，有add value，放幅畫喺個場上，同人哋唔同。藝術修為會畀到我哋一個基礎。」
部份獲資助往外國進修的學生表示，若沒有獎學金資助，會選擇留港升學。李玉芳笑言，獲獎學生在每個學期需向她提交報告，「講番喺外國讀成點，有冇俾人蝦！」她指自己不會要求學生未來幫九倉打工，「但希望佢哋同其他人分享番個經歷，推動其他人。」