美國男籃上周六喺聯合中心友賽巴西，輕鬆大炒對方95:78係意料中事；最開心反而係養傷咁耐終於喺主場復出嘅公牛控衞戴歷路斯，佢亦冇辜負坐爆全場嘅球迷，以出色表現宣佈3年前嘅常規賽MVP返嚟喇！
呢場係美國隊備戰月底世界盃嘅首場熱身賽，球員喺熱身時就齊齊着上支持保羅佐治（PG）嘅練習衫（右圖），仲養緊傷嘅PG都話多謝班兄弟咁有心。隨住杜蘭特退隊，如無意外今次帶領美國隊嘅重任將會落喺戴歷路斯身上，賽前介紹佢出場嗰陣，班球迷已經high爆大叫「MVP」；雖然佢落場24分鐘只係攞咗7分，但佢表現出MVP級數嘅速度同爆發力，先係成班球迷最關心嘅事。
對上兩季加埋只係打過10場波嘅路斯，今場喺完半場前由後場帶波殺入籃底，再射入個壓哨靚波，令球迷拍爛手掌；最後順利帶領球隊贏波，佢仲話自己興奮到應該會成晚瞓唔着㖭。至於幫美國隊做助教嘅公牛主教練泰保杜亦話好滿意路斯今場嘅表現。至於射入全場最高20分嘅安東尼戴維斯，喺完場前4分幾鐘拐吓拐吓咁出場，不過應該冇咩大礙嘅。美國隊周日已經飛咗去紐約繼續集訓，嚟緊周三同周五就會分別友賽多明尼加共和國同埋波多黎各。
識睇，一定係睇足英台【英波Live】：
http://soccer.appledaily.com
http://bit.ly/engballlive