中國古代有四大美人，當今嘅建制派反佔中陣營，都有三個另類「美」魔女好受歡迎，以奇異行徑獲得唔少網民狂賜like！而呢三位「美」魔女，噚日齊集反佔中遊行，各出奇謀大鬥法：淨心BB擺出卡娃衣呢港女V字po、私煙BB出動白雪雪肉腿吸睛，元秋唔賣外表齋靠口才，用福建話冧粉絲。唔知當中邊一位最啱大家心水？八方堅信阿爺見到呢班「美」魔女咁瞓身，第日實有打賞！
闊別粉絲一段時間嘅愛港行動召集人陳淨心，噚日一早喺維園嘅公眾人士區，同近卅人一齊揮動國旗、區旗振聲威！八方上前想問淨心BB點解遊行，佢身邊有人一知係《蘋果》即刻叫佢唔好答，淨心BB卻冇所謂，只提點八方「你影得我靚啲得㗎喇」，然後從容揮旗兼擺港女V字po，含羞答答咁話嚟支持狼英，真係我見猶憐咯！
私煙唔信有人收錢遊行
相對之下，肉地夠厚嘅李偲嫣知玉女之路難行，索性大晒肉腿殺出新血路。絕食過後，佢噚日着熱褲大晒白雪雪肉腿，帶領正義聯盟參加遊行撐警察，烈日下仲化行妝，藍眼影配口紅，以最佳形象搶鏡。佢話唔信有人收錢遊行，覺得一切都係抹黑喎。唔知見到傳媒圖文並茂報道市民收錢上街後，私煙會唔會覺得自己思想太pure呢？
身為大家姐嘅蔣麗芸，噚日唔賣美色賣口乖，喺街站向蔡素玉請教一番後，不停用福建話大叫「加油」。咁又係，唔少參加者都係福建社團動員，為咗箍實呢啲鐵票，元秋唔瞓身突圍而出都唔得啦！
李八方
mailto:[email protected]
