上回提過現在全中環最屈就那個人叫陳南祿，有年輕的基金經理朋友讀後即找我：「佢喺恒隆打咗工4年就收到100球人工，有幾屈就呀！」明白嘅。生活在萬惡資本主義社會，我們習慣用錢衡量人的成就。我這等膚淺的港女，當然也不會察覺陳南祿的屈就，直至接二連三，與中環頂層人士交流是非，對方閑閑地問：「點解Philip Chen要去恒隆？」
Well，第一次問是藍籌公司高層，我答他：「我點知？」第二次問是投行部門洋人主管，我心諗：「點解又係Philip Chen？」第三次問是大型基金投資總監，我終於按捺不住，反問他：「其實陳南祿去恒隆有乜問題先？」
對方呷口鐵觀音，「My fault。我應該問點解Philip肯去跟Ronnie Chan。」噢，咁跟恒隆董事長陳啟宗有乜問題吖又？「以Philip工作能力、人脈、背景，你知他外父是美心創辦人伍沾德？」但他人工幾十球一年，假假地都算打工皇帝吖。投資總監說：「打工仔最緊要係乜？係跟邊個老闆。」
他解釋，以前陳南祿在太古打工，又是第一個出任國泰航空行政總裁的華人，威水到不得了，叻過好多富二代。
現在做華資行大班都唔失禮，只是老闆鍾意發表意見，自己要識擺位囉。君不見過往傳媒好友的陳南祿高調不再，其招牌笑容不變，變的是站在老闆旁小心陪笑。早排業績記者會，RC一唱，就PC唯唯諾諾，情況與前任恒隆執董吳士元未走前一模一樣，「只是Terry Ng由佐丹奴過檔恒隆係升班，Philip就……」我無言，只得講：「子非祿，焉知祿之諾」。
何淑茵
mailto:[email protected]