恭喜！恭喜！阿仙奴喺上周六嘅英超夜場，主場以2:1反勝水晶宮，近5季首次喺英超首戰贏波；不過，兵工廠嘅中場辛迪卡索拉就慘喇，竟然喺比賽期間，俾球證噴到一面都係……消失的噴霧！
消失的噴霧喺今夏嘅世界盃之後大紅，歐洲主要聯賽喺新一季都紛紛採用，英超亦唔例外，不過，唔知係咪喺上周六夜場執法嘅球證莫斯冇乜點試過噴霧點用，喺戰至41分鐘當阿仙奴獲得自由球而卡索拉準備去主射時，莫斯撳極支噴霧都冇嘢出，之後就突然仙女散花，噴到卡索拉一面都係。不過，好彩，卡索拉冇嬲，仲識得笑㖭。
藍斯絕殺2:1挫水晶宮
講番呢場比賽，兵工廠面對賽前有教頭普利斯走頭嘅水晶宮，竟然俾對手新簽後衞軒治蘭特偷雞入1球而先落後，好彩之後憑後衞哥斯尼追平，再喺完場前由艾朗藍斯建功，反勝2:1，自09/10球季以嚟，第一次喺聯賽首場贏波。值得一提嘅係今場入球功臣之一嘅艾朗藍斯，佢繼上季之後，今季勇態持續，而唔知係咪人紅就自然順眼，藍斯仲越望越靚仔，淨係佢個set到行嘅髮型，竟然可以喺打足90+分鐘後，依然「屹立不倒」，就令我求大俠既羨慕又妒忌。
藍斯喺賽後話：「我今季為自己訂下咗入20球嘅目標，今場呢一球連同之前社區盾嘅入球，我已經有兩球喇！另外，球隊喺上屆得第4，今季我就希望我哋可以成績更上一層樓，攞到前3名。」至於阿仙奴領隊雲格亦對藍斯有讚冇彈：「藍斯可以不斷有入波絕對唔係偶然嘅，而係因為佢好識走位同埋補位，知道邊度可以入波。球隊今役喺上半場表現一般，好彩喺下半場我哋加快咗比賽節奏，終於成功全取3分。」
識睇，一定係睇足英台【英波Live】：
http://soccer.appledaily.com
http://bit.ly/engballlive