江若琳（Elanne）前晚喺尖沙嘴出席手錶品牌活動，佢同寰宇合約官司進入司法程序，問佢出席活動有冇問題呢？Elanne笑住話：「反正都俾人告緊啦！自己有問過律師，交晒畀佢哋處理。」Elanne話之後都有電影、劇集同活動傾緊，係咪賺錢交律師費？佢話：「所以我今日喺呢度，自己唔想畀壓力屋企人。」
有傳江媽媽賣樓幫手畀律師費？Elanne支吾以對咁話：「唔想探究係咪事實，父母當仔女遇到困難，都會無條件支持，之前佢哋擔心咗我咁多年，𠵱家唔想令佢哋百上加斤。媽咪係全球唯一獨家有免息分期嘅借貸公司，幫咗我好多。」有冇接洽其他公司傾轉會？佢話：「做人應該搞清楚一樣，先到第二樣，呢啲嘢要講道義，唔好麻煩到人。」
安宰賢掃貨冇人識
另外，同場嘅韓星安宰賢憑《來自星星的你》飾演全智賢弟弟人氣急升，吸引近500名粉絲逼爆現場，佢不停放電做嘟嘴、心心手勢，仲大讚港女：「她們看起來很有活力很陽光。」安宰賢噚日下晝到香港仔行outlet掃貨，其間遇到唔少韓國人，但佢哋好似唔認得安宰賢，之後佢到機場搭機飛返首爾，約40位女粉絲送機，安宰賢親切地揮手鞠躬。
撰文：馮仁昭
