楊千嬅前晚一身黑白裝束，現身中環大會堂，出席資深芭蕾舞家毛妹（廖本懷夫人）芭蕾舞學校舉辦的50周年慈善舞蹈表演。原來千嬅曾拜倒毛妹門下，並由5歲學跳芭蕾舞，她笑言：「30幾年前開始喺毛妹學校學芭蕾舞，由5歲學到18歲，跳到爆晒腳甲。」
跳舞爆腳甲紮繃帶
問到千嬅會否畀囝囝Torres接觸芭蕾舞，她表示：「學跳舞要好刻苦，咪腳尖唔知佢得唔得，佢轉轉吓可能會暈，佢得兩歲幾仲細，呢啲都要睇佢興趣，細細個唔知自己鍾意啲乜，唔鍾意啲乜，我細嗰陣時都係媽咪畀我學乜就學乜，嗰時我媽咪覺得跳舞係好淑女，嗰陣真係成日爆腳甲，要紮繃帶。」
千嬅近日忙於與古天樂拍《五個小孩的校長》，少了時間陪Torres，她表示：「呢排成日喺片場，冇時間陪佢，我媽咪就勁播我嘅MV，浸佢，佢識唱《飲酒思源》，我睇到真係喊出嚟。」千嬅大讚囝囝有唱歌天份，更即時拎出手機，原來她拍了Torres在家中唱K的片段，片中的Torres揸着咪凝神望着千嬅的MV跟着唱：「我老公就覺得關佢事，因為佢覺得自己比我更熱愛唱歌，係遺傳佢嘅，我唔理佢。」之後，千嬅未有留下睇表演，即趕到紅館會合夫婿丁子高，支持好友杜德偉的個人演唱會。
採訪、攝影：羅慧敏
