剛剛被會員通過不信任動議嘅律師會會長林新強，原來係新界人嚟㗎！八方聽聞，佢仲同身兼律師嘅鄉議局當然執委林國昌係疏堂兄弟嚟㗎。林國昌噚日同八方證實，佢哋兩個係同一個祖宗嘅，計起上嚟，佢算得上係阿哥㖭。
林國昌話佢哋唔係自細已相認，尤其父輩有成七兄弟咁多，所以去到佢呢代，好多疏堂兄弟都未必識；有年因為一齊拜山，先至知悉大家原來係兄弟。林國昌仲話，實情佢同林新強「各自各生活」，平時都「冇乜兩句」；至於今次林新強被人不信任，林國昌投咩票？佢好曖昧咁話「講嚟做乜嘢吖」，總之兩邊都對結果愕然！八方聽聞有新界人叫過林新強上街反佔中，但落難嘅林新強話自己啱啱被人動議罷免，不便上街。