一代笑匠羅賓威廉斯（Robin Williams）畢生為觀眾送上歡樂，最終卻以悲劇落幕。上周一羅賓威廉斯疑抑鬱雙料自殺身亡，原來香港冷面笑匠許冠文10多年前亦患上抑鬱，他呼籲患者要睇醫生接受治療外，更分享他半杯水的自我提醒理論：「睇住半杯水時，你可以話死啦就嚟飲晒，又可以話好在剩番一半，其實杯水冇變。」許冠文籲凡事只要多面睇，感覺便會截然不同。
撰文：馬建華
喜劇演員不一定快樂。「好多人覺得引你笑嘅人會開心，其實佢係犧牲緊自己嘅開心去引你笑。」冷面笑匠許冠文，日前受訪時對多年來鍾愛的羅賓威廉斯疑抑鬱雙料自殺身亡不無感慨。
下月便72歲的許冠文，70年代開始便與弟弟許冠傑在電視節目《雙星報喜》中發放笑彈，多年來更拍過《半斤八両》、《賣身契》等無數電影帶給觀眾歡樂，82年更憑《摩登保鑣》奪得第一屆香港電影金像獎最佳男主角。但這位香港笑匠，原來也曾受抑鬱症困擾。10多年前，許冠文因為子女赴加拿大留學頓感失落而患上輕度抑鬱，他說：「佢哋出發前幾日，諗到佢哋一走就四年，我突然好失落，佢哋出發後我就成個人灰晒，覺得仲拍乜嘢戲呀？食飯又冇胃口，仔女未落機，我就買一叠信封貼晒郵票不停寫，跟住就覺得要搵醫生傾。」
凡事多角度思考
及時就醫配合藥物，令許冠文很快便跨過難關。許冠文說：「有時我認真頂唔順好抑鬱時，都會食粒好輕微鎮定劑，藥物係好重要，但一定要醫生開。有情緒病只要搵醫生幫手，有百分之99都可以過到關，但當然唔能夠太依賴藥物。」
藥物之外，心理治療同樣重要，許冠文覺得每個人一定要有傾訴心事的朋友，他並分享一套自我提醒理論說：「睇住半杯水時，你可以話死啦就嚟飲晒，又可以話好在剩番一半，其實杯水冇變，只係用乜嘢角度去睇。」許冠文籲大家凡事要多方面睇，不要「側埋」一邊，這樣整件事的感覺便會截然不同。除此之外，發掘興趣亦能舒緩情緒，愛釣魚及打哥爾夫球的他說：「對我許冠文嚟講，每次同條魚鬥力時就忘記晒所有嘢，返屋企沖個涼瞓醒，就發覺噚日灰嘅嘢冇晒，就係咁簡單。」
正視抑鬱病症
許冠文修讀心理學，他認為引致抑鬱是體內分泌血清素不正常，他說：「雖然冇科學根據指喜劇演員易患抑鬱，但以我所認識，包括自己在內好多位（喜劇演員）都有，只係未必嚴重到會自殺。」喜劇演員較易抑鬱，許冠文認為有三個原因：「點解呢個人咁鍾意引人發笑？就係佢潛意識好需要同缺乏歡笑。第二點係引人發笑需要不斷思考，Robin Williams講每句說話都好精，你估真係隨口講出嚟？係要諗，一個人成日講每句嘢都要諗，係壓力好大，佢唔可能係快樂。」
許冠文以自身經歷呼籲大眾正視抑鬱，訪問結束前，他還分享他跟家人間一個常說的小故事：「我成日要佢哋答應我，若果有日想自殺，最後一定要畀個電話我，因為當你肯打呢個電話，就唔會再有事。」
