近兩季冠軍練馬師，分別係葉楚航同方嘉柏，都冇大摩份，但如果計獎金排行榜，大摩已連續好多季排第一，上季佢個馬房攞到1.36億元獎金，更刷新香港紀錄；如果一切順利嘅話，今季摩廐獎金相信一定超過1.5億元，會再次寫下歷史。
點解咁講呢？一來新季馬會大幅提升大賽獎金，二來睇番目前各廐形勢，大摩有12匹100分或以上一班馬，數目是各廐之冠。方嘉柏雖係冠軍練馬師，但100分或以上馬得六隻，佢嘅最佳短途馬「天久」更將轉八歲，好難唔退化。告東尼亦面對類似問題，兩屆香港盃盟主「加州萬里」將轉九歲，唔通真係青春不老咩？而高伯新隻惡馬「事事為王」更走咗去配種，令摩廐馬王「威爾頓」新季喺長途大賽，少咗一匹勁敵，攞獎金話都冇咁易。除咗「威爾頓」之外，廐侶「步步友」連埋來港前只跑過11次，5歲馬方興未艾，大把中距離一哩大賽任佢發揮，所以1.5億獎金呢個預測，大摩九成九可以做得到。