女仔睇波真係好似信教，睇真啲其實似信邪教多啲。
呢個周末，我正喺倫敦體驗英超開「咧」嘅快感，加上夏天嘅巴西世盃之旅，我呢位足球信徒先明白要令女士們入魔信教，原來所謂乜嘢道理都係如同虛設，信或唔信只在乎一樣嘢，就係愛定唔愛！愛就乜都得，唔愛就乜都假！
喺巴西嘅個幾月，我自以為其中一個主要任務，就係令到身邊嘅拍檔決志愛足球，所以我嘗試去帶出足球嘅樂趣以及世界盃嘅過去，結果係似做緊阿爸，成日講波好睇㗎波好正㗎！直到一位仁兄出現我先知自己嘥氣，就係嗰位baby face嘅占士洛迪古斯嘞。我拍檔由第一眼見到佢真人開始，好似突然上足電咁，眼神有希望咗，連笑容都甜咗，呢副虔誠信教樣，其實只靠一個心上人，就搞掂咗！阿小女生仲自動過戶做埋皇馬fans㖭！
當然，同個波click唔click得着，都仲要睇妳係邊種口味嘅女生啦。今次歐洲之旅首先路過意大利羅馬，發現古城真係無咩sell，仲係賣緊托迪叔叔，悶係悶啲，但古董呢味嘢同古井一樣，唔起眼但好襟睇，啱晒有深度嘅女生。
去到巴黎，所有好嘢都係要抬頭仰望嘅，包括鐵塔同伊巴，一樣咁高不可攀，啱晒各位鍾意小鳥依人嘅小女子。
最後一站倫敦，街頭巷尾曝光最多係摩連奴。我今次朝聖一心就係要導屋企兩位女生入槌仔幫，咁第日可以一齊祈禱嘛！細妹無問題嘞，一話佢知韋斯咸入面有肥皂泡玩就興奮晒；至於大妹，sell肥sam可能佢即刻走人，不如試吓呃佢安祖卡路爾係最高大靚仔領隊啦，橫掂佢都無得出，都係坐場邊！
KEYMAN
節目主持電郵：
http://[email protected]