美國男籃又有新搞作！目前仲喺芝加哥備戰月底世界盃嘅美國隊，上周五訓練完咗齊齊玩近期熱爆美國嘅冰桶大挑戰（ice bucket challenge），6位球員排排坐，俾一桶桶冰水照頭淋，其實都係行善啫。
點名挑戰奧巴馬
平時睇波見史堤芬居里、夏登、迪洛桑、基爾、法尼特同吉辛斯幾咁勇猛，點知佢哋俾人淋冰水嘅反應會咁誇張，未開始淋已經叫定先，淋完仲即刻跳起周圍走。不過，細心啲睇，史堤芬居里只係個頭淋到少少，個身根本冇濕到！佢哋仲點名挑戰美國總統奧巴馬、聯盟總裁阿當施華同名嘴奧花雲費㖭。其實K教練早幾日已經玩咗，仲指明要一班美國隊球員喺18號訓練完畢就即刻接受挑戰，點知幾位球員率先玩咗，唔知戴歷路斯同「笠水」嘅K艾榮到時會唔會補番數呢？
至於無緣代表國家隊嘅球星亦一呼百應，杜蘭特同基斯保羅都有玩，連「巨無霸」奧尼爾都玩埋一份，不過佢只係用一個透明杯仔倒咗滴水落個頭度，即刻扮打冷震，似係搞笑多啲。至於上季新人王卡達威廉士就霸氣十足，兩桶冰水兜頭淋都面不改容，全程仲有5位比堅尼女郎為佢服務㖭。
喺美國各界瘋行嘅ALS冰桶挑戰，規定如果俾人點名參加之後，24小時內唔能夠完成呢個挑戰，就要捐100美元畀ALS協會。ALS（肌肉萎縮性側面硬化症）暫時未有可以徹底根治嘅方法，所以全城都踴躍參加呢個冰桶大挑戰，令協會喺短短幾周已經籌到近1,000萬美元做研究。除咗ALS，其實仲有唔少運動員透過冰水挑戰為其他慈善機構做推廣，引起大眾關注，例如曼聯球員費查同女子高球手魏聖美。
PG有信心100%好番
至於斷腳退隊嘅保羅佐治（PG）隻右腳仲紮住，但佢周五出席記者會時話有信心可以完全康復，打番自己之前嘅水準。PG又話，唔會因為今次意外而怪責美國籃總，仲話想代表國家隊參加2016奧運㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive