由7月中至今一個月時間，大家唞完又要重新整頓，包括作息同投注策略，事關球會球員又再執過晒，𠵱兩晚幾場波點都要睇吓幾支球隊手術成唔成功。另外，有幾隊當然係食住花生睇佢整容失敗，你懂的。
今屆熱話當然係曼聯，即使你有幾歧視49,000（死獌狗，網絡波台常用詞），呢次真係要睇佢可唔可以由上屆Meggie咁樣，變番做Angelababy（反曼人士一定死咒：攝灶罅baby就有）。今期雲高爾（圖）好似蔣天生咁大氣勢重振「紅興」，連18號「陽萎格」都可以醫番好，就知有嘢睇。上屆「椰絲」揸旗，經已辣㷫紅興海外百萬幫眾，一齊用念力叫佢下台，情形就好似早前「師爺會揸旗」「淋身漒」，被人以不信任動議開佢波一樣，大快人心。即使我唔係曼迷亦唔係師爺，都一樣支持。
回帶世盃雲帥，荷蘭百二分鐘換龍門單嘢已經起晒朵，但另外一單可能你冇留意，就係季軍賽對巴西之前（記住巴西之前輸畀德國1:7），爆響口話「荷蘭唔係好在乎季軍」，我當時一睇即刻覺得有料到：荷蘭買得，扮謙之餘又畀面巴西，和波唔核突贏就更寸，所以今屆我係為佢睇曼聯。
至於今日想賺番幾嚿，但又唔想出賣自己去遊行嘅你，可以諗諗早飛嘅「車路士同鄉會」同今晚「利物浦總商會」，一樣有錢派。
梁柏堅
填詞人+彩池人