林峯離開無綫回復自由身，曾表示稍後會將工作重心放在電影及音樂方面，日前與周麗淇齊齊到杭州，出席早前在內地拍攝了半年，即將於浙江衛視播的歷史劇《衛子夫》宣傳活動，與當地影迷在戲院一同欣賞電視劇的第三集。
曾拍過多套古裝劇的林峯，今次擔大旗演漢武帝，難怪他激讚劇集是歷史正劇，更直指香港演員需要多喝墨水，才能令角色有說服力。本報昨致電林峯，問他可擔心言論會令一眾香港演員感到不悅？他解釋說：「我都係香港演員，都覺香港演員要多啲墨水，我其實係話自己啫，因為內地好多前輩文化底蘊好豐厚，所以我覺得自己要努力強化自己，冇其他意思，可能係文字上嘅誤會啫。」
林峯又補充謂：「今次成個劇都係現場收音，又要記好對白，又要講好普通話，其實都係一個挑戰，正正因為呢個原因，希望個角色人物可以盡量做到觀眾心目中嘅形象，演員一定要多啲了解歷史，因為要啲墨水喺戲入面，先會有說服力。」
自認《尋秦記》冇演技
自2001年拍《尋秦記》，林峯今次再演帝王角色，他認為自己進步不少，更自嘲當時沒演技可言，但因為本身對看歴史書頗有興趣，今次亦做足了準備，希望觀眾會喜歡。有內地傳媒問林峯可有覺得無綫欠他一個視帝獎座，他立即耍手擰頭，又笑言大家指他官腔也要說，表示覺得獎項並不重要，現在只想尋求一個新突破。
採訪：小米