七年來未執過書架，而書籍一路增加，架上每格擺書二至三行，只睇到最外面之書名，入面嗰行究竟有乜書，只能靠記憶去估，搵書十分困難。世界盃過後，既冇波睇，亦冇馬跑，周末幾得閒噃，於是逢禮拜六日就搵時間去做一個大工程──將擺放全屋雜亂無章嘅書重新上架，分類編排。嘩，原來做得幾辛苦嘅，開猛冷氣仍然做到身水身汗，肌肉酸痛。
執執吓，發現竟然有六套不同版本嘅《古文觀止》，又有多年不見，封塵已久嘅「古董」，例如學生時代在學生報發表嘅全版政治性及經濟性文章，又有一份1992年岑逸飛手寫嘅20年易經卦象藏在雜文之中，於是勾起一番回憶。
依稀記得，1992年岑公與幾位老友在深水埗（？）一間酒樓夜飯，講及1997香港回歸，前途未卜，眾人要求岑公呢位易學專家為香港占卦，向眾人示警。岑公受不起我地苦纏，概然應允，大約個零星期之後，佢交咗五張紙俾大家，左丁山影咗一份在家收藏，但睇過一次之後，就唔知擺咗去邊咯。點知今次再睇，已係22年之後，恍如隔世，一睇就呻笨呻到書架上嘅塵埃跌晒落嚟。
點解呢？岑公為1992-2012年逐年寫下預言，1994年云：「渙卦，坎上巽下，渙散之象，股市開始不穩！船隻在海上航行有風險，有波浪。」左丁山就在1994年下錯投資決定，俾波浪搞到翻艇，20年後諗起都心痛。1997年云：「遯卦，艮上乾下，離失之象，小人得勢，潔身引退……二陰下，長四陽，逃避之象，遠離股市，上上之策。」2002年云：「蹇卦，退守之卦，險難當前，見險止步，股市又再大跌，避之則吉。」2003年云：「艮卦，停滯之象，兩山重叠，陰陽不相牽，勉強前進，徒勞無功。」2004年云：「謙卦，股市開始復甦。」2006年云：「萃卦，潤澤之象，金融有轉機，可大展鴻圖，集中買藍籌。」2007年云：「晉卦，夜盡天明，運勢如旭日東升，股市亦然。」恒指就在2007年破三萬點，創歷史高位。之後由2008至2012，岑公只寫卦象，不作評語，岑公寫下啲卦象，因左丁山係門外漢，好多睇唔明，但在1994、1997、2002、2004、2007呢幾年，講得斬釘截鐵，如果信到十足，左丁山可以趨吉避凶，賺多幾個零。正是時也命也，呢份岑公在1992年寫下嘅預測，竟在左家失蹤22年後方重見天日，抵自己唔發。