沙田老牌地區政團公民力量同新民黨結盟後，銳意革新，陸續有新面孔接班。沙田友同八方講，公記前沙田區議會主席韋國洪個仔韋德麟，早前加入新民黨，𠵱家做公記社區幹事，對明年區選躍躍欲試。
區二代青出於藍，沙田友話韋德麟無意喺韋國洪老巢徑口村去馬，反而睇中新翠邨選區，而呢個區現任區議員李錦明係公記元老，隨劉江華打江山、同韋國洪等一班兄弟拍住上廿幾年，對於世姪要上位，八方聽聞李錦明好有意見，揚言要退出公民力量。
公記向來團結，罕有退黨事件，李錦明噚日同八方講「暫時未正式退黨，仲傾緊」，表示聽聞韋德麟「好似」想出選，表現「好有信心、有把握」，又透露曾與新民黨主席葉太講數，「但冇乜決定」。李錦明話自己雖然已64歲，「不過身體仲好健康」。
知情人士指公記同葉太都認為李錦明支持度一般，加上做多一屆年近70，故寧願換馬。韋德麟30歲，係註冊社工，韋國洪話阿仔只係「跟吓地區工作」，暫未決定係咪參選，「都冇位，去邊度選？」