有「港大飯堂」之稱嘅莎厘娜餐廳經過一個禮拜試業，噚日正式開業，仲搞咗個開業派對免費招待新知舊雨，好似港大前校長徐立之聯同港大教務長韋永庚、教務處顧問陳鈞潤一齊嚟剪綵，咁嘅陣容，你話莎厘娜餐廳唔係「港大飯堂」，都無人信啦！
莎厘娜餐廳重開，最開心梗係創辦人王殿華，佢話唔單止同一班港大老友重聚，一齊飲羅宋湯，仲話「終於有飯食」。第二代老闆王宗俠話，場面好熱鬧，有成60幾人參加派對，而生意算幾好，唔少街坊熟客嚟光顧，午巿晚巿都好爆，呢個月訂枱都好滿。佢溫馨提示啲客人嚟幫襯前，可以先訂枱，「驚客人嚟到等位，就唔係咁好意思」。