盡做，鄭秀文（Sammi）在《失戀急讓》中，冒拗柴危險全程6吋高跟鞋跟身，再盡點，親熱戲不再是古天樂、劉德華專利，新「入幕」的有張家輝、黃子華，同場加插「上床」、「就地正法」。去到盡，或者可以考慮入場觀眾有機會贏得Sammi演唱會或者黃子華棟篤笑入場券一張，企位都好，成件事一定生色不少，連謝票都可以慳返。
撰文：譚倩宜
上映日期：8月21日
有一段時間沒拍愛情喜劇的Sammi，跟張家輝於電影《失戀急讓》中首次合作，飾演女主角沙律，戲中Sammi熱愛老公黃子華，最後卻換來子華痛罵離婚，中途誤打誤撞遇上剛失戀的家輝，雙雙受情傷卻又被迫同居，結果不打不相識變成歡喜冤家。Sammi坦言接拍此片是因為張家輝，她說：「家輝戲好、人好，鏡頭前後都令人舒服自在。我喜歡工作認真嘅人，彼此互動都好合拍。」令Sammi覺得最抵死是家輝不停爆肚搞笑，試過床戲時大叫要「就地正法」，令到Sammi忍不住笑要NG，但笑料只是片中的配菜。
激賞的反而是Sammi再次發揮在《盲探》中那份歇斯底里精神，當她跟家輝訴說自己生活只有老公黃子華的一幕，那份情真演繹令觀眾及fans心痛，她直言有仔細研究這場戲：「一拎到劇本，就開始仔細思考，點先可以掌握嗰份痛。呢場戲並唔容易，透過呢場表白，徹底理解佢嘅內心，亦係我喺呢套電影入面非常非常重點嘅一場，由情緒掌握同變換、語氣、眼神、身體語言以至同家輝嘅交流，我都好鍾意。」
男人哭了女人不哭
戲內Sammi經常穿着6吋的高跟鞋，來討好前夫黃子華：「沙律每時每刻都將身高盡力撐到最高，除咗討好丈夫，亦係填補缺少咗嘅自我認可。沙律嘅世界就係丈夫，人生亦只係為咗丈夫，失去丈夫，恍如斷咗嘅高跟鞋，潰不成形。」她笑言愛情是人生最大動力，但奉勸女士愛人同時亦要懂愛自己：「愛情無疑係生命嘅大動力，但不能成為絕對依賴，對一個人死心塌地並唔係錯，但愛到迷失自己又唔識自愛就變成危險。」戲中Sammi曾說：「因為你（張家輝）不堅強，所以我要堅強」，她指這點跟自己頗似：「有時，該喊嘅時候女人唔喊，係因為女人好清楚、明白到必須忍住痛楚，去承擔男人嘅崩潰同脆弱，女人必須用自己僅有嘅堅強，去支撐倒下咗嘅男人，『女人不哭，因為，男人哭了』。」
親吻戲太盡太自然
哭泣並非女人專利，戲中家輝被女友胡杏兒撇後，在車廂內猶如孩子般嚎哭，那場戲足足喊了一分鐘，他形容是從影以來哭得最慘烈一次：「原本係應導演卓韻芝要求，後來就借自己經歷嚟發揮。」喊戲可以「盡做」，跟Sammi親熱戲亦「做到盡」，只是太盡太自然，當中於車廂的親吻戲，令客串的姜武在旁看着也呆了，家輝笑說：「劇本早就有，係導演安排好，但拍攝前我都有同Sammi溝通好。」戲中角色因為工作忽略了家人，家輝感同身受：「作為都市人呢個情況好普遍，自己年輕時都係好努力工作，令到同家人相處嘅時間少咗，但𠵱家希望兩邊都可以平衡到，工作之餘亦有時間陪家人、照顧小朋友，特別係同囡囡嘅相處。」
《失》片除了感動位及激情位外，尚有不少搞笑抵死的戲碼，當中家輝於人中位置黏着一條「閃電毛」更是電影內一大笑位。家輝指自己拍畢此戲份後，未有如角色般對別人目光變得敏感。
攝影：CK@Secret 9 Production HOuse
服裝提供：Neil Barrett@Joyce（張家輝）
Chalayan（鄭秀文）
