港超聯賽程改完又改，足總噚日終於出到全季賽程，首周正如傑志總領隊兼足總董事伍健早前爆料所講，只安排到兩場；揭幕戰12號喺旺角場踢夜波，由傑志（圖）對升班馬和富大埔；南華要到28號先登場，至於東方就到10月2號先作客黃大仙。
新一季港超聯落實升一降一，佢哋嘅賽程遲遲未出，參賽球隊好似東方、飛馬同澳滌等，喺7月開操計，齋操兩個幾月先踢第一場聯賽，難怪足總喺編排賽期被人質疑。至於噚日7間港超聯球隊高層坐埋傾直播安排，大家似乎達成共識，新一季唔會繼續畀錢「現在台」搞直播，目前同兩間免費電視台傾緊合作嘅可能性；據與會者講，由於「是旦台」收費高，反而「二奶台」會收順啲，雖然佢哋收視接近零，但話晒都係免費頻道，所以球會高層傾向每間球會夾少啲錢。
識睇，一定係睇足英台【英波Live】：
http://soccer.appledaily.com
http://bit.ly/engballlive