為期6日嘅歐洲田徑錦標賽今周喺瑞士蘇黎世進行緊，周四嘅男子3,000米障礙賽決賽戰果峯迴路轉，拋離對手成條街過終點嘅法國選手麥希斯比拿巴特，因為喺比賽最後階段除衫而俾人取消資格（DQ），痛失金牌。
由於領先得太多，麥希斯跑到最後一個彎位，終點都未到就high到除衫，攤開雙手示意觀眾為佢歡呼，一早收晒步之下以8分25秒32衝線。見佢咁輕佻，裁判已經即場整張黃牌畀佢嘆吓，點知之後西班牙代表隊投訴，麥希斯最終直頭俾人DQ埋。最後塊金牌落咗喺佢嘅國家隊隊友高華手上，而西班牙就成功琜到面銅牌；唔怪之得佢哋咁落力投訴麥希斯啦。
有打隊友前科
29歲嘅麥希斯喺奧運攞過兩塊障礙賽銀牌，亦係歐洲冠軍同紀錄保持者；樂極生悲嘅佢就上fb盡訴心中情，解釋自己當時想好似足球員咁除衫慶祝，完全冇睇唔起對手或其他人嘅意思；佢仲話，雖然冇咗個金牌，但係自己衝線時嘅興奮心情同感受，係唔會俾人攞走埋嘅。
佢喺田徑界出名係麻煩多多嘅臭馬一名，衰嘢真係多到數唔晒，同班前法國國腳拿斯尼同賓艾化等真係有得揮。不過佢之前嘅場上不君子行為全部都係發生喺完場後，今次未過終點就搞事，都係第一次。麥希斯11年喺鑽石聯賽摩納哥站嘅1,500米比賽完咗後，同隊友發生口角繼而動武，結果俾法國田聯罰停賽。到咗前年，佢喺芬蘭舉行嘅歐錦賽又係贏咗3,000米障礙賽，但過咗終點之後無啦啦好惡咁拍走隔籬吉祥物手上嘅禮物，仲用力推呢隻由14歲細路女扮嘅吉祥物㖭。
跳高選手離奇跣腳
另外，周三舉行嘅男子跳高預賽亦都出現「意想不到」嘅場面，俄羅斯嘅迪美迪克離奇跣腳，未跳起就已經跌低咗，結果總成績包尾，無緣參加周五嘅決賽，仲要喺國際大賽出醜，真係慘慘豬。