香港政策研究所行政總裁馮可強早前發起咗個溫和派聯署，希望各界平心靜氣考慮吓政改中間方案，聯署獲得唔少猛人如曾鈺成、梁錦松、陳婉嫻同徐立之等支持外，連民主黨成員吳永輝都簽埋。但原來支持聯署嘅，仲有的士小巴權益關注大聯盟主席黎銘洪（圖），佢上周更突然現身呢個聯署記者會，仲發言話支持，但馮可強卻「走寶」，無即場搵黎銘洪簽埋名。
八方問黎銘洪，佢話當日諗住去打吓氣，而佢唔係齋講唔做，前日同噚日兩日出動咗三架小巴同兩架的士，喺車身掛上三款唔同字眼嘅橫額，先後巡遊新界九龍及港島區，其中一款寫住「國家安全，港人治港，要取平衡。為香港，互諒互讓，協商政改方案」。因乜解究咁瞓身？黎銘洪話唔想見到各走極端，嚇怕投資，希望大家平心靜氣傾一傾。