百年老校拔萃男書院嘅中樂團威到東歐！男拔28名中一至中四生同10名舊生組成中樂團，喺7月底赴東歐斯洛伐克參加「第六屆布拉提斯拉瓦國際青年音樂節」，獲全場總冠軍、金獎同最佳指揮。表演好有香港特色，包括演奏《太平山下不夜城》；20幾分鐘嘅吹彈拉打，據知演奏好有潮州同廣東音樂神韻，令東歐人感受到香港人嘅「國樂」藝術。
由於演出同學大多係初中生，出現唔少蝦碌事，包括有敲擊樂嘅學生，離開酒店去緊比賽場地先發現有鼓但冇鼓棍，需折返攞番；又有中三學生抵達斯洛伐克後幾個鐘，就收到電訊公司5,900蚊漫遊費SMS警告，嚇到全團同學仔即刻唔敢再玩電話；仲有中一同學仍然保留小學雞文化，舉手請示去廁所。男拔雖然一向好西化，但中樂團喺1960年就成立，每年規模有成60人。