滙海探戈:下周滙市 孖J定調 - 奇兵

滙海探戈:下周滙市 孖J定調 - 奇兵

風水輪流轉,歐美股市踏入Q3由盛轉弱,適逢歐美就烏克蘭問題跟俄羅斯勢成水火,擔心被封殺嘅俄資被逼水向東流,今期食正滬港通概念嘅中港股自然如虎添翼,恒指與25000近在咫尺。除了股市,大家更關心嘅樓市亦恢復亢奮。你話恨跌不成降又好,可憐天下父母官也好,幾大財金官員近日又煞有介事指樓市泡沫頻臨爆破,擔心美息回升下,本地資金充裕情況會突然逆轉,樓市會跟隨資金流向一齊歸「西」,奉勸買家小心行事,大有狂瀾既倒之意。
不過,政府的狼來了言論呢幾年已聽到厭,且論據欠缺說服力,炒家和強國人等代罪羔羊先後被封殺,奈何樓市升勢依舊,政府就變本加厲推出BSD、DSD和收緊按揭等辣招遏市,美其名是理順需求,實際上卻扭曲市場,逼到連啲較有米嘅亦走埋去買細價樓,搞到個市側晒一邊,令實力較次嘅越來越難上車,若呢幾年誤信政府之言租樓等跌價,唔計機會成本,淨輸part都輸死。

當然,一個壞嘅鐘每日都會準兩次,估樓價由盛轉衰遲早中,問題是近年買家必須通過銀行的壓力測試(包括預設美息上升),加上聯儲局主席耶倫緩步加息的意向路人皆見,本地樓市是否如當局形容般搖搖欲墜?況且,聯儲局2008年將息口降至1厘後,本港息口已沒有跟減,奇怪金管局近年卻多次預警港息可能較美息率先向上(或與資金流向有關),令筆者困惑,如果近期俄水東流的趨勢持續,抵銷部份資金流走風險,聯儲局加息會否觸發樓市鬼哭神嚎,真是未知之數。

工資縮水 英鎊喪插

一年一度燕歸來,金融市場下周聚焦孖J,Jackson Hole銀行家年會及Janet Yellen是也。事關由美國堪薩斯聯儲銀行舉辦的銀行家年會,本周四將於Jackson Hole揭幕,耶倫首次以儲局主席身份主持大局。由於金融海嘯後,年會每每是前主席伯南克披露放水意向的吹風大會,近年備受注視,適逢儲局醞釀退市,市場聚焦耶倫會否蕭規曹隨,效發伯南克宣佈儲局政策的新路向。

雖則美國上季GDP增幅達4%,表現遠勝歐洲和日本,但上月新增職位遜預期,加上儲局仍強調就業市場唔得,外界普遍預期耶倫唔會就息口前景有新嘢話畀大家知,留待9月會議息後至交代。
本周滙市方面,美滙指數續創一年新高,昨日見81.69,英國上季工資按年倒退,是五年來首次下跌,加上英倫銀行將工資增長預測大劈一半,人工停滯不前成加息絆腳石,加上行長卡尼建調現時難加息,英鎊昨日已跌到1.6659美元,創四個月低位。

奇兵
本欄逢周五刊登