【七筆思議】一言棠:有戲,睇唔睇? - 歐錦棠

【七筆思議】
一言棠:有戲,睇唔睇? - 歐錦棠

近排不只天氣,就連本地新聞都非常「懨悶」,人人自說自話,個個龍門任搬,身為香港蟻民,左右為難兩面不是人,因為「尋釁滋事」原來等同對政治過份熱心,但對時事冷感又俾人鬧「還未醒的人」。高官應該早早以身作則教路,面對任何挑剔,只要一句「我係以個人身份」,咁就乜都卸晒,唔使頭痕。
既然現實醜惡,不如入戲院睇場電影消暑解悶兼且暫時逃避現實。
最近有兩部好片推介,第一部《舞自由》,並非拍到開巷的街舞系列電影,而是有血有肉真人真事改編,論熱血程度,如果套用那用到爛的「為咗XX你可以去到幾盡?」的電影宣傳口號,片中主角對藝術自由的表達那種奮不顧身、死而後已的精神,更加令人動容。故事背景是以「神權統治」為名,禁絕西方文化的伊朗。自孔雀皇朝被推翻後,舞蹈學習和演出被禁,但「手之舞之足之蹈之」是言語歌詠以外的情感表達,禁之不絕,現今網絡世界無遠弗屆,片中主角就同友好翻牆睇片,一於抄MJ,學雷里耶夫,自學而有成,更冒險遷往沙漠秘密演出,既熱衷藝術,關心社會民生理所當然,公義自由豈是蛇齋餅糭所能替代。09年伊朗大選,反對派因「有篩選」而大熱慘敗,市民號召上街發起綠色革命,但遭當權者暴力鎮壓,白色恐怖籠罩全國,民警以監察為名無法無天,主角險死還生,出走法國得政治庇護,事件才得公諸於世。
以為遠及天涯?可以是近在咫尺。反政府遊行就係暴民?早前不是有人提議設立民警分擔香港警察工作?何止消暑,簡直越睇越心寒,不如睇套文學層次高啲,莎士比亞原著《科利奧蘭納斯》(Coriolanus)。科劇講述主人翁Coriolanus大將軍失意朝政,後來一朝得志即變臉不認人,凡事剛愎自用,傲慢固執,與民為敵,最後當然身敗名裂收場慘淡。但劇中主角表現出作為政治人物在民望和己見的取捨和矛盾,尤其深刻,同是人民公敵,但並非我們慣見那些負資產家不成家的首長官員可相提並論,此劇為沙翁後期所作悲劇,多年來名氣遠不及《哈姆雷特》,實在是滄海遺珠。
電影本身是我早前介紹過的英國錄播舞台劇,由電影《雷神奇俠》演員Tom Hiddleston擔綱演出,倫敦公演期間一票難求,舞台電影版更深入細膩,不容錯過。
「唓,又話逃避現實?點解兩部都講政治嘅?」
嫌複雜,想唔用腦?睇《沒女》啦!不過咪又係另一層面嘅政治!
生活根本離不開政治,你仲未知咩?

【一言棠】
撰文:歐錦棠

除表演藝術,也酷愛文字、影像及武術,其文章往往一針見血。

本欄逢周五刊登