喺球壇，呢個夏天都發生咗唔少不可思議嘅事，例如蘇亞雷斯喺世盃咬人，巴西竟然喺地頭俾人炒7:1等。不過，如果問曼聯迷咩事最不可思議，相信唔少人會答：艾舒利楊格鹹魚翻生。
近兩年，楊格俾球迷插到上天花頂。佢作為翼鋒，唔識扭波，永遠都淨係識喺左路推大位，俾對手睇通晒；就算難得畀佢出到波或者射到波，多數都係直接出底線。當雲高爾嚟到曼聯後，曼聯迷唔係擔心楊格冇表現，而係擔心冇球會肯買佢。點知，雲高爾喺熱身賽轉踢3-4-1-2陣式，楊格竟然如魚得水，由邊緣人變成主力。小弟認為楊格一直冇變，變嘅係戰術要求。上季莫耶斯嘅戰術好靠兩翼嘅個人能力去突破落底，然後傳中，令到楊格盤扭差嘅弱點暴露出嚟。
雲高爾講求球員之間多走位配合，楊格上腳機會減少，加強跑動。楊格本身無波跑動唔錯，佢踢維拉嗰陣，最叻就係喺前場不斷跑，接應長傳打反擊。楊格踢翼衞的話，佢唔需要控住個波正面扭人，而係有更多空間畀佢跑上去做助攻，加上翼衞唔應該壓得太前，K角位出波好過落底線，啱晒楊格啲習慣。因此，楊格有翻生之勢，唔係佢突然開竅，而係雲高爾套踢法咁啱適合佢發揮，又睇吓聽日對史雲斯佢有冇機會正選？ 文：咖喱