耀才證券（1428）上星期五專登出通告預告可能喺市場抽水，估唔到執行董事陳永誠呢個星期一就沽定貨先。根據聯交所資料，身兼交易總監嘅陳永誠周一減持10萬股，每股平均價1.58元，套現15.8萬元，金額唔算多，只係公司嗰頭話諗緊集資，執董就走去沽貨，似係擔心公司集資後股價偏軟，於是早啲搵個靚價沽貨囉。
其實呢個多月，唔止陳永誠減持耀才，獨立非執董凌國輝上個月亦3次減持耀才，合共沽售69萬股，平均價介乎1.48至1.55元，套現大約105萬元。而陳永誠亦仲持有10萬股。
耀才出名宣傳方式出位，作風夠晒積極，亦會低佣搶客，可惜睇番佢嘅股價走勢，就認真麻麻。呢隻股上市四年，仲潛緊水，噚日收報1.54元，跟招股價1.6元仲有啲啲距離。