後人發佈先人死咗消息嘅叫做訃聞，冇寫下款又詛咒人哋死嘅，又叫乜嘢呢？有人噚日喺《東方日報》A7版登咗個全版「訃告」，話一個別名肥佬黎嘅男子「黎志英」，今年8月7日因患愛滋病及多種癌症併發不治身亡，死時65歲，又話佢家屬都患重病，所以唔會舉辦任何儀式，結尾仲請「2傳霉員工節哀順變」，但睇勻成版唔見有下款，只見同版頂部「東方日報」四個字都變成黑色。
「唔好意思使你失望」
訃告提到嘅出生資料，同壹傳媒集團主席黎智英一樣，到底此「黎志英」係咪影射彼黎智英？相信各位讀者「你懂的」。
壹傳媒嘅肥佬黎噚日朝早睇到訃告，即刻潮玩自拍諷刺一番。佢喺短片形容篇訃告係笑話，但就開得唔夠大，「因為我都冇AIDS，你想咒我死？好容易㗎咋，你一路咒、一路問候你阿媽，加埋你阿媽啲功力，咁你一路問候阿媽，我可能真係俾你咒到都唔定㗎。繼續去做啦，繼續問候你阿媽，唔好意思呀，使你失望」。
點解黎志英要「死」於8月7日？八方唔係閻羅王，所以睇唔透生死。反而睇到當日嘅《蘋果日報》，頭版講弒親碎屍案；當日出版嗰一期《壹週刊》，港聞Book A封面講高登行動組起底，娛樂Book B則係關於模特兒Mandy Lieu同已婚澳門大佬撻着，唔知有冇玄機呢？但見有網民留言，話登全版廣告要10幾萬蚊，既然花得起錢咒人，捐嚟幫吓人咪仲好！
惡搞訃告事件瞬即引起外國傳媒關注，《紐約時報》嘅著名中國通記者傅才德（Michael Forsythe），即時寫咗一篇網誌贈興，阿Mike第一時間報道「黎志英」訃告之餘，仲引用咗《教父》經典場面，話事件好比新聞界中人斬咗個馬頭放喺死對頭床上。
李八方
mailto:[email protected]