正所謂一朝天子一朝臣，太古系新主席史樂山上任剛好五個月就有人事變動。明年1月起，太古地產（1972）行政總裁郭鵬冇得喺呢個山頭做話事人，調返去太古A（019）管數，出任太古財務、企業發展董事兼國泰航空（293）董事。查實郭鵬1998至2009年做過太古財務董事，今次調職些少係重操故業。
史樂山噚日喺業績會上面帶笑容為人事變動解畫。佢話，見到太古日後有好多唔同嘅發展機會，需要資深管理層領導，相信郭鵬係最好人選，仲話今次人事變動代表太古進入新階段。而太古地產現任董事白德利將出任太古地產行政總裁。
不過，就有口痕友猜測郭鵬今次被調返去太古，似係「燉冬菇」，事關太古基本上只係控股公司，郭鵬對此一問先「哈哈哈」冷笑幾聲，然後就話好開心接任新工作。佢認為，新職務係幫集團做戰略定位，唔覺得係降職。