向來語不驚人誓不休嘅恒隆集團主席陳啟宗，噚日出席一個研討會時繼續發表「偉論」，仲越講越high至鬼拍後尾枕，連心底話都講埋出嚟。佢話香港自回歸以嚟，有兩班人不按《基本法》辦事，第一班係搞提名委員會嘅人：「佢哋明知《基本法》唔係咁寫，唔從正常渠道修改《基本法》，淨係話要抗爭。」八方相信佢可能係想講公民提名，但由於自high之中，所以連自己講錯都唔知。
至於第二班唔按《基本法》辦事嘅人，竟然係北京？佢解釋：「（北京以為）不管就是管好，應該管嘅就唔管，亦都係不接受《基本法》辦事。」但由於北京已經搞份白皮書，做番啱嘞，所以其實係仲有另一班人未回歸喎，「呢班人就用違法手段嚟反佔中」。陳啟宗，世事都給你看穿了。