世界盃完結後，話咁快就到英超開鑼。有人話上屆係「後費Sir」嘅英超，費Sir退休果然對曼聯帶嚟意想不到嘅影響，曼聯踢出史上最差嘅成績；同時利物浦重回爭冠之列、阿仙奴打破無冠宿命、強勢回歸車路士嘅摩連奴四大皆空、曼城喺比歷連尼帶領下變得穩定，以往睇嚟係英超慣例嘅，都喺上季被打破。
嚟到今屆，英超列強變得更多，曼聯、利物浦同車路士都大舉增兵，就連阿仙奴都喺轉會市場上變得豪氣。單睇陣容，英超Big 5可以話係不分高低，各有強弱。但我估今年英超頭3位嘅排名，順序係車路士，曼城同利物浦。以下就係我嘅「不專業分析」：
NO.1 車路士
車路士上屆入波唔多，所以簽入馬體會前鋒迪亞高哥斯達，加上杜奧巴回歸，配合法比加斯、後防嘅菲臘路爾斯同泰拔高圖爾斯，每個新球員都可以填補車路士嘅不足。我相信摩連奴一定好好用佢哋！雖然我鍾意阿仙奴，但車路士先係今屆英超最強嘅球隊。
NO.2 曼城
曼城今屆買人唔算多，買親都係實用球員，焦點反而落喺外借嘅林伯身上，真係好想睇吓佢對番車路士入波會唔會慶祝！曼城一向多人，夾咗一季之後默契一定會更好，今屆應該坐亞望冠，能唔能夠衞冕就要睇吓教頭功力。
NO.3 利物浦
賣走蘇亞雷斯，利物浦買咗好多人，1換8好似好抵，不過入唔入番咁多波真係唔敢包！始終冇咗「1個打10個」嘅蘇亞雷斯，利記要爭冠軍，相信機會不大鳥！前3就應該OK！
以上係我小小意見，成季流流長，變化咁多，邊有咁易估中晒呀！所以我都係專心享受睇波嘅樂趣好過！
LULU
不懂踢波愛睇波