名人投資者趁旺市出貨。人稱「白姐姐」嘅白韻琹同埋「法律超人」謝偉俊，啱啱將中環歐陸貿易中心一個超過2,600方呎嘅寫字樓以5,800萬元沽出，賬面勁賺4,000萬元。
聽聞，白姐姐與謝偉俊9年前係幫朋友落住定金先，點知呢位朋友臨尾唔認數，白姐姐惟有焗住買咗去。呢個寫字樓曾經丟空三幾年，又做過眼科診所。白姐姐當年只係用1,800萬元買入，𠵱家一放就賺到笑，乜都抵番晒啦！
白姐姐原來都幾鍾情磚頭，據了解，佢喺銅鑼灣百德新街都揸住好幾個海景物業，喺深圳灣口岸附近最近又成功出貨，賺咗三幾千萬人仔，低調發財就係呢啲囉！
另一邊廂，已故「電器大王」蒙民偉遺孀王蓓芬，近年密密掃貨，市場傳出，最近以4億元買入中半山寶雲道10號塊屋地，買家就係王蓓芬。