內地之「和訊財經App」經常有內地過癮新聞，例如8月11日就有周永康直接干預顧雛軍案，親自打電話不許放人；雷士照明內鬥打人內幕，傳工行副行長張紅力薪資係工行最高等等，都係市場人士會追住睇睇嘅。
和訊報導，工行副行長張紅力係一位傳奇性人物，佢嘅學歷不算好標青，但能在德國第一大行擔任亞洲投資銀行業務大哥，必有過人能耐。先講年紀，張紅力生於1965，今年只有49歲，1984年畢業於黑龍江八一農墾大學，之後到加拿大Alberta大學讀遺傳學碩士，到加州聖哥拉大學讀MBA，呢啲學歷，難與清華、北大畢業，哈佛JD或MBA甚至博士嘅眾多海歸派相比，而且佢又唔係名門子弟、高幹之後㖭。但即使係咁，佢仍然可以順利在惠普、施羅德、高盛等大機構入職，2001年（36歲）加入德意志銀行擔任高職；2010年，作為第一位來自外資金融機構嘅高層，正式任職中國四大國有銀行之一嘅副行長，據傳薪資高過董事長㖭。而且佢唔係憑後台入選嘅，要與50名候選人參加最後面試，「考官」包括劉明康、樓繼偉、陳元、郭樹清、李揚、巴曙松、中央組織部部長李源潮（現國家副主席）及工行董事長姜建清等人。張紅力最後力壓群英得到聘書，充份顯示出佢有精叻聰明過人之處。
咁嘅一流賓架，現在竟然被德意志銀行控告，索償本金399.39萬美元加利息232.3萬美元，真係令人估唔到。其實約三個月前，本地報章已有報導，張紅力太太（張太Ji Zhengrong）控告星展銀行，聲稱在2008年之前，在星展有家庭信託，被星展推介高風險投資，導致損失，要求星展賠償，案情有啲似當年金融海嘯餘波。星展認為張太索償缺乏理據，積極抗辯。耐人尋味嘅係，庭上透露，張太在星展可運用嘅信貸額曾高達一億美元，張紅力與張太簽署了若干銀行文件，但張紅力在北京作視像作供時宣稱自己工作繁忙，太太叫佢簽文件，佢就照簽可也，冇睇到啲文件內容，自己無時間理會張太為家庭信託嘅投資事情。張太自稱在屋企打理家頭細務，照顧兒子，有東北財經大學碩士學位，主修運輸及物流管理。咁講法，佢一個家庭主婦可以令星展借貸一億美元？張紅力在投資銀行界站穩高位，精明到極，竟然簽文件之前冇睇清楚，又冇過問太太之巨額投資？睇呢啲新聞古仔，有趣過睇戲！