國企輪流轉，呢期凡親有質地而大落後嘅，都做咗資金飛撲嘅對象，場內天津港（3382）集齊市場炒國企嘅題材，未郁過，等放紙鳶。
京、津兩市上周簽署《貫徹落實京津冀協同發展重大國家戰略推進實施重點工作協議》，京津冀一體化進度加速，市場估計，天津好快繼上海後，成為內地第二個自貿區。
港口股食正國策
又之前提過，阿爺港口策略，鼓勵大型港口企業，活化港口土地。呢個政策貫徹阿爺家陣搞緊大型國、央企混合制發模模式。天津港係土儲最多港口股之一，食正國策「重大國家戰略」，同板塊重組改革，港口股，唔係冇題材。
天津港冇對應A股，但集團旗下天津港口，同樣喺上海上市。後邊天津港口最新造8.51元人仔，折合10蚊港元，家陣1.2倍PB。天津港現價（1.32元），PB得0.7倍。
市場炒滬港通，天津港揩邊都有呢個concept。場內行家，重慶港九1.7倍PB、唐山港1.6倍、鹽田港2.1倍，其他珠海港、寧波港全部1倍或樓上。繼大連港（2880）後，天津港係PB最平一隻港口股。
又場內專業保守預測，天津港今年單位數溫和增長，就算係咁，PE得10倍。上邊大連港11倍，內地行家12倍至18倍不等，天津港平霸。
呢期資金市，資金掘落後嘢炒，連煤鋼鐵錫都唔放過，又行家當中，廈門港務（3378）半年翻近半番，天津港半年升咗6%咁大把，實情係未大郁過，講PB、PE，又勁吸引，實落鑊。
買天津港，當PB上番1倍，約1.9元，講緊要升44%，呢個PB水位，冇耐追到內地行家。
錢雋
細價股專家
本欄逢周二、三、五刊出