蜘蛛俠前晚現身多蒙特主場？非也，只係奧巴美揚入波之後笠個蜘蛛俠頭套慶祝箒。多蒙特最終靠米希達利恩同埋呢個老翻蜘蛛俠各入1球，以2:0擊敗拜仁慕尼黑，連續兩年捧走德國超級盃。
領多蒙特贏2:0封王
拜仁班世盃球星啱啱歸隊，所以教練哥迪奧拿出弱陣，正選有成4個小將。多蒙特都唔算好強陣，不過基爾、舒姆沙、米希達利恩同奧巴美揚等常規球員都喺度，陣容相對較完整。最終米希達利恩同奧巴美揚上下半場各建一功，協助佢哋喺主場贏拜仁2:0捧走德超盃，報番上季喺德甲同德盃屈居拜仁之後得亞軍之仇。同時，佢哋喺2013/14球季錄得逾2.6億歐元營業額，比原先預期嘅2.5億歐元多，可以話係雙喜臨門。
由於雙方都冇強陣，加上拜仁嘅倒戈前鋒羅拔利雲度夫斯基踢得好hea，所以場波唔算太好睇。好在奧巴美揚識得搞氣氛，入波後喺自隻襪度攞咗個蜘蛛俠頭套出嚟，扮蜘蛛俠慶祝。查實佢之前效力聖伊天時都試過咁做，但就唔用頭套，而係戴個蜘蛛俠面具。拜仁唔係太重視德超盃，反而查維馬天尼斯傷出令佢哋傷啲。哥帥表示馬天尼斯99%係膝頭十字韌帶撕裂，事後證實唞7個月，要到下年3月中先可以同球迷見面。
