姜麗文曾自爆同日本紅星拍拖，有估計係山下智久，跟住再自爆7年前同內地男演員拍拖，點知畀內地紅女星撬牆腳，緋聞多多嘅佢噚日喺微博貼攬仔相，對方係韓國人氣組合2PM成員Nichkhun，唔知會唔會又傳緋聞呢！
「我好鍾意2PM」
原來姜麗文爸爸秦沛同Nichkhun拍緊內地劇《許願清單》，姜麗文以探爸爸班為名，搵男神影相貼微博晒命，哥哥姜文杰就扮嫉妒留言：「爸，有一天和我韓國女神們合作的話可否也通知聲？」Nichkhun嘅粉絲仲勁呷醋留言：「不要臉的女人」、「放開你的豬蹄！」
馮仁昭噚日打電話畀姜麗文，佢話：「我好鍾意2PM，朋友介紹識咗幾年，Nichkhun好nice，唔怕佢啲fans呷醋，我哋friend嚟㗎，佢喺微博都寫明我哋係好朋友，佢又公開咗女友。」之前傳佢同緋聞男友鄭俊弘分手，問到現時乜關係？姜麗文話：「好朋友，遲啲佢有演唱會，我當然會去睇。」
另有份拍《許》嘅汪東城（大東）同舊愛瑞莎傳復合，噚日大東喺微博貼拖手相留言：「我愛您，希望您永遠健康快樂！我會盡我最大的全力去守護您的笑容。」原來其中一隻係大東媽咪手，令網友空歡喜一場。
撰文：馮仁昭