商台嘅女名嘴，有人「被辭職」，有人則選擇自動離開。主持緊《在晴朗的一天出發》嘅黃潔慧噚日喺facebook宣佈，中秋節後離開商台，去英國倫敦政經學院（LSE）修讀比較政治碩士。佢話以前試過兩度考入美國大學嘅博士課程，但因為冇錢而冇得讀，今次就考到英國嘅志奮令獎學金（Chevening Scholarship），笑稱如此黃金機會，「同爭取真普選一樣，可一不可再」。
八方問過黃潔慧，佢話如果冇計錯，下月8日中秋節係last day，佢話李慧玲事件係佢有新動向嘅契機，當時由傍晚調去朝早做節目，因此再諗吓前路。佢話男朋友對佢出走一年都「有意見」，但都知道佢嘅性格，決定咗要去就一定會去，冇符之下，10月都會陪佢過去開學。佢話𠵱家好多嘢未搞，例如要先睇學校要求開學前讀咗嘅八本書。返嚟後仲開唔開咪？讀完書先再算咯！