混血名模Mandy Lieu（圖）同太陽娛樂文化老闆、澳門賭業猛人周焯華（洗米華）戀情被《壹週刊》曝光後，一對當事人未有公開露面，而女方就被拍到上星期五離港去咗台灣避靜。
向來諸事八卦嘅八方發現，Mandy噚日就喺一份報章嘅專欄中，發表以〈愛的教育〉為題嘅文章，提及「愛」對於佢嘅人生十分重要：「自問也會遇到錯誤缺失，但每次我都會為我愛的人付出一切。」
Mandy喺文章末段提及，經歷最近發生嘅事，令佢感受周遭家人與朋友嘅愛，表明「未來，會重新由零開始，努力做好自己和堅強地走下去，絕對不會令愛我的人失望」。八方就此專欄嘗試聯絡Mandy本人，求證佢係咪同洗米華分手？但Mandy截稿前未有回覆。而佢嘅模特兒經理人Marie話Mandy唔喺港：「佢嘅私人事我唔知。」