葉偉信久不久就會問你一些發人深省的問題，那天在拍攝等候途中，他突然問我「為甚麼揸飛機要着飛機師制服？」，我其實知答乜都死，但又好想知佢想發表甚麼，於是我好老正回覆佢「係一個代表性，某個專業身份的象徵！」，「咁如果突然飛飛吓，所有機師都死晒，全機得一個乘客識揸飛機，佢使唔使換番件機師制服至有資格揸？」，行家一出手，便知有沒有！我承認我回不到了，於是我好虛咁答佢「其實都係為咗型箒！」，「咪係囉！想型咪搵套制服嚟着囉，唔使為咗着而去考機師㗎！」，我已經靜到一粒嗲都冇，靜靜聽着他的發表！「其實要達到一個目標，可以有好多方法，但通常我都會揀錯，細個恨戴眼鏡，我就日日貼住部電視嚟睇，睇咗年幾終於有近視可以配眼鏡，然後至知其實想戴眼鏡，配無度數的平光鏡就可以！」
要達到目的，確實可以有很多方法，正如我當初一心要入電影圈，最終目的都是為睇「明星」，於是我揀了以做編劇、導演來接觸各大小明星，但由開始到合格勝任這崗位，我所付出的血淚，與我接觸大小明星的數目，絕對不成正比！有時看着那些資深的特約演員，由死𡃁妹做到今時今日人老珠黃的C9，但仍繼續演那些「先生幾多位？飲茶定水？」的知客或侍應角色，又或者案發現場圍觀人群的路人甲，當然她們也要付出體力、青春與血汗，但對比起做編劇與導演的工作，她們的崗位，算得上是「筍位」，最重要的是這些年來，她們見過的明星一定比我多，當我還努力要諗出好橋說服劉德華演出，希望有機會見到佢，這些資深演員一早已跟劉德華有對手戲，有一位還跟劉德華有親密演出，演一個死去的士兵，被劉德華抱着演了秒半喊戲！追求達到見明星這個目的，我確實揀了一個錯誤方法！
年輕時偷阿媽錢去電髮被發現，阿媽痛心得淚流披面，當年某位好友剛電了一個爆炸頭，走來安慰我「你想電髮，使乜偷阿媽錢！好似我咁去做『洗頭仔』，洗過兩星期，啲師傅就肯用客人用剩嘅電髮水幫你電髮，然後仲有糧出，可以孝敬阿媽！」
今日我終於醒起當年好友的這番話，要達到目的，可以有很多不同方法，而你揀的每一個方法，都可以改變你的命運，世事無絕對，正為目標勇往直前的你，試試放緩腳步想一想，或許還有更快捷簡便收穫更豐的路，只是你跑得太快看漏了！
【鄒四的夢幻之旅】
撰文：鄒凱光
集編劇、導演、演員、主持於一身的中年漢，有着男人的浪漫。
本欄逢周四刊登