世盃圓滿落幕，新球季將為《蘋果》波經執筆的女名家Lulu、有線球彩台的Whitney及繼續「披甲」的Wendy，焦點放回歐洲足球身上；當中周六回歸的英超自是全港焦點，且看有線雙W睇好的利物浦及車路士醒，還是「燈神」力撐的阿仙奴及曼聯勁！
記者︰鄧永賢 攝影︰陳奕釗
「燈神」Lulu 期待仙魔對壘
英超周六強勢回歸，Lulu亦挾着去季「燈神」的戰績捲土重來。對於新一季，自稱「阿仙Lu」的她，無懼自己的燈力，不諱言繼續支持兵工廠︰「好開心領隊雲格唔再孤寒，上季買完奧斯爾，今季又買阿歷斯山齊士，真係要畀個『Good』佢。不過既然唔孤寒，就不如買埋我嘅『巴神』巴洛迪利啦！」除了場內增兵之外，Lulu更喜見愛隊場外也增強實力，引入了應屆世盃盟主德國的體能教練Shad Forsythe，「我哋上季下半季受傷兵影響成績，漏走咗冠軍，希望今季喺新體能教練帶領下，可以操『弗』艾朗藍斯、韋舒亞等一班球員。」
不過，一隻手掌拍不響，英超有「仙」也要有「魔」才夠刺激。經過一個令人失望的球季後，Lulu期望老對手曼聯可以重振雄風，與阿仙奴拗一拗手瓜︰「曼聯今季改由雲高爾執教，新官上任三把火，8.16揭幕戰喺主場對上季表現一般嘅史雲斯，相信一定可旗開得勝！」不過紅魔球迷最關心的，仍是揭幕戰當日，她會否穿上曼聯球衣呢？
「利神」Whitney 等睇紅軍歐戰
女生看足球當然因愛看靚仔，被譽為「恒管薛凱琪」的Whitney，自去年入行後逐漸愛上足球，在巴西世盃後亦愛上哥倫比亞中場占士洛迪古斯，但小妮子愛靚仔也沒有衝昏頭腦，不忘支持愛隊之一利物浦在歐聯創高峯。
靚仔球星是女生愛足球的原動力之一，向來評述澳職的Whitney坦言，最愛是約滿FC悉尼的意大利型男迪比亞路。不過偶像不是男友，愛多個也不算多，她直言其「新歡」正是皇馬的占士︰「佢得23歲就已經組織家庭，又好波又係好好先生，揀男友都要揀呢啲。」
然而，Whitney愛屋不及烏，歐聯卻不睇好皇馬，「雖然我鍾意皇馬，但曼城上季重奪英超，加上阿古路同耶耶托尼等星級戰將壓陣，勢如破竹，相信係時候衝出英格蘭。」至於愛隊利物浦今季有蘇亞雷斯轉投巴塞，她亦認命不敢奢望在本土賽有好成績，只放眼歐聯賽場。
「魔神」Wendy 必撐型男摩帥
除了Lulu睇好曼聯重拾「魔性」，本身是曼迷的Wendy更希望愛隊谷底反彈，來季重返歐聯行列。不過，作為理性球迷，Wendy也不奢望紅魔可以即時回勇，反而看好另一個「摩」──摩連奴帶領的車路士。
Wendy今季看好車仔的其中一個原因，正是與該隊領隊摩連奴有緣︰「我同摩連奴有多次近距離接觸，佢真係好有型。佢今季引入迪亞高哥斯達同法比加斯等西甲兵，絕對係冠軍大熱。至於我嘅愛隊曼聯上季只得第7，但綜觀新帥雲高爾嘅履歷，期待佢帶領球隊反彈，重返歐聯就好啦。」
雖說Wendy是忠實紅魔迷，但她卻驚爆最愛的現役球員是曼城的耶耶托尼︰「唔知點解我總覺得黑人勁啲，可能我太膚淺，但我經常希望曼聯有個好似耶耶托尼咁助攻助守，又喺關鍵時刻仍可射入靚波嘅黑人防中。」不過，她強調不看好「藍月亮」，歐聯戰場更肯定是德國天下︰「首選當然拜仁，佢哋今季仲喺多蒙特羅致羅拔利雲度夫斯基，真係冇得輸！」
後 記
名家3缺1！3位女名家在新一個球季各有喜愛，車仔、利記及兵工廠平分秋色，未分高下；可惜本報另一位客席女名家Kit（圖），採訪當日因事未能現身，要是這位忠實紅軍迷同場出現，利記在季前這場「甜美牙骱戰」，人多勢眾下定必先勝一仗！
