隔牆有耳:大聯盟集體中亂噏毒 - 李八方

隔牆有耳:
大聯盟集體中亂噏毒 - 李八方

「反佔中」大聯盟發言人周融,早前被工聯會女示威者亂噏叫錯做「張融」後,噚日主持茶敍時,同大聯盟成員疑似集體感染「亂噏」病毒,先由佢叫錯青年民建聯副主席周浩鼎做「周浩輝」,跟住輪到「反佔中」公關程介南叫錯大聯盟發言人施榮懷做「宋榮懷」。最後連平日唔多講嘢的大聯盟發言人吳秋北,亦將「堅持公民提名」講錯做「堅持提委會提名」,再鬧爆堅持提委會提名人士係「嘥時間」,聽到在場記者都嚇一跳。難怪大聯盟話8.17大遊行當日,已請咗前港台DJ伍家廉做主持,可惜八方翻查紀錄,發現呢位伍生主持活動時,曾叫錯何志平做林瑞麟。