喺建制派大鑼大鼓反佔中，將社會氣氛推向極端對立之際，有心水清人士忽然記得，身為中央政策組首席顧問嘅邵善波，唔係好想社會和諧，所以獻計搵咗社會各界搞咗個名為「特首盃」嘅地區足球賽咩？點解搞咗成年都冇影？有政界中人話為免搶反佔中風頭，「特首盃」遲啲先舉行，但有乜嘢效果呢？真係冇人知。不過八方聽聞，波叔膠橋無限，呢個「特首盃」只係其中之一！
有知情人士憶述，某次政府開內部會，波叔突然忽發奇想，話外國有啲政黨選輸咗選舉之後，都會搞個反省大會振作士氣，自以為好醒嘅波叔話，特區政府何不學習呢？波叔仲建議搞大佢，要搞就搞個全民自省日，等大家洗滌心靈、激勵士氣云云。據聞有在席官員聽完之後滴晒汗，最後有人忍唔住、鼓起最大嘅勇氣，好婉轉咁講咗句類似唔係適當時間搞之類嘅說話，曲線ban咗波叔條膠橋，令波叔冇癮地知難而退！
搞完反佔中 特首盃出台
至於冇咗影個「特首盃」，八方聽聞波叔都係諗住特區政府牽頭搞，但最後喺內部討論時，唔少官員都覺得搞嚟吃力不討好，最終ban咗條橋，但波叔死心不息，退而求其次搵民間「水喉」幫拖，促成佢嘅「美事」，搞完反佔中就會出台！
不過有官場中人話呀，可能波叔膠橋俾人ban得太多，佢近期已經冇乜「鴻圖大計」提出，叫政府官員落實，該官場中人笑稱佢哋終於可以樂得安靜，佢希望建制派各大政團，冇因為佢哋向波叔「落閘」，因而受到不必要的「滋擾」啦！
李八方
mailto:[email protected]